Shikwa poem lyrics by (Allama Iqbal R.A)
kyuuñ ziyāñ-kār banūñ sūd-farāmosh rahūñ
fikr-e-fardā na karūñ mahv-e-ġham-e-dosh rahūñ
naale bulbul ke sunūñ aur hama-tan gosh rahūñ
ham-navā maiñ bhī koī gul huuñ ki ḳhāmosh rahūñ
jur.at-āmoz mirī tāb-e-suḳhan hai mujh ko
shikva allāh se ḳhākam-ba-dahan hai mujh ko
hai bajā sheva-e-taslīm meñ mash.hūr haiñ ham
qissa-e-dard sunāte haiñ ki majbūr haiñ ham
saaz ḳhāmosh haiñ fariyād se māmūr haiñ ham
naala aatā hai agar lab pe to ma.azūr haiñ ham
ai ḳhudā shikva-e-arbāb-e-vafā bhī sun le
ḳhūgar-e-hamd se thoḌā sā gila bhī sun le
thī to maujūd azal se hī tirī zāt-e-qadīm
phuul thā zeb-e-chaman par na pareshāñ thī shamīm
shart insāf hai ai sāhib-e-altāf-e-amīm
bū-e-gul phailtī kis tarah jo hotī na nasīm
ham ko jam.īyat-e-ḳhātir ye pareshānī thī
varna ummat tire mahbūb kī dīvānī thī
ham se pahle thā ajab tere jahāñ kā manzar
kahīñ masjūd the patthar kahīñ ma.abūd shajar
ḳhūgar-e-paikar-e-mahsūs thī insāñ kī nazar
māntā phir koī an-dekhe ḳhudā ko kyūñkar
tujh ko ma.alūm hai letā thā koī naam tirā
quvvat-e-bāzu-e-muslim ne kiyā kaam tirā
bas rahe the yahīñ saljūq bhī tūrānī bhī
ahl-e-chīñ chiin meñ īrān meñ sāsānī bhī
isī māmūre meñ ābād the yūnānī bhī
isī duniyā meñ yahūdī bhī the nasrānī bhī
par tire naam pe talvār uThā.ī kis ne
baat jo bigḌī huī thī vo banā.ī kis ne
the hamīñ ek tire mārka-ārāoñ meñ
ḳhushkiyoñ meñ kabhī laḌte kabhī dariyāoñ meñ
diiñ azāneñ kabhī europe ke kalīsāoñ meñ
kabhī africa ke tapte hue sahrāoñ meñ
shaan āñkhoñ meñ na jachtī thī jahāñ-dāroñ kī
kalma paḌhte the hamīñ chhāñv meñ talvāroñ kī
ham jo jiite the to jangoñ kī musībat ke liye
aur marte the tire naam kī azmat ke liye
thī na kuchh teġhzanī apnī hukūmat ke liye
sar-ba-kaf phirte the kyā dahr meñ daulat ke liye
qaum apnī jo zar-o-māl-e-jahāñ par martī
but-faroshī ke evaz but-shikanī kyuuñ kartī
Tal na sakte the agar jang meñ aḌ jaate the
paañv sheroñ ke bhī maidāñ se ukhaḌ jaate the
tujh se sarkash huā koī to bigaḌ jaate the
teġh kyā chiiz hai ham top se laḌ jaate the
naqsh-e-tauhīd kā har dil pe biThāyā ham ne
zer-e-ḳhanjar bhī ye paiġhām sunāyā ham ne
tū hī kah de ki ukhāḌā dar-e-ḳhaibar kis ne
shahr qaisar kā jo thā us ko kiyā sar kis ne
toḌe maḳhlūq ḳhudā-vandoñ ke paikar kis ne
kaaT kar rakh diye kuffār ke lashkar kis ne
kis ne ThanDā kiyā ātish-kada-e-īrāñ ko
kis ne phir zinda kiyā tazkira-e-yazdāñ ko
kaun sī qaum faqat terī talabgār huī
aur tere liye zahmat-kash-e-paikār huī
kis kī shamshīr jahāñgīr jahāñ-dār huī
kis kī takbīr se duniyā tirī bedār huī
kis kī haibat se sanam sahme hue rahte the
muñh ke bal gir ke hū-allahu-ahad kahte the
aa gayā ain laḌā.ī meñ agar vaqt-e-namāz
qibla-rū ho ke zamīñ-bos huī qaum-e-hijāz
ek hī saf meñ khaḌe ho ga.e mahmūd o ayaaz
na koī banda rahā aur na koī banda-navāz
banda o sāhab o mohtāj o ġhanī ek hue
terī sarkār meñ pahuñche to sabhī ek hue
mahfil-e-kaun-o-makāñ meñ sahar o shaam phire
mai-e-tauhīd ko le kar sifat-e-jām phire
koh meñ dasht meñ le kar tirā paiġhām phire
aur ma.alūm hai tujh ko kabhī nākām phire
dasht to dasht haiñ dariyā bhī na chhoḌe ham ne
bahr-e-zulmāt meñ dauḌā diye ghoḌe ham ne
safha-e-dahr se bātil ko miTāyā ham ne
nau-e-insāñ ko ġhulāmī se chhuḌāyā ham ne
tere ka.abe ko jabīnoñ se basāyā ham ne
tere qur.ān ko sīnoñ se lagāyā ham ne
phir bhī ham se ye gila hai ki vafādār nahīñ
ham vafādār nahīñ tū bhī to dildār nahīñ
ummateñ aur bhī haiñ un meñ gunahgār bhī haiñ
ijz vaale bhī haiñ mast-e-mai-e-pindār bhī haiñ
un meñ kāhil bhī haiñ ġhāfil bhī haiñ hushyār bhī haiñ
saikḌoñ haiñ ki tire naam se be-zār bhī haiñ
rahmateñ haiñ tirī aġhyār ke kāshānoñ par
barq girtī hai to bechāre musalmānoñ par
but sanam-ḳhānoñ meñ kahte haiñ musalmān ga.e
hai ḳhushī un ko ki ka.abe ke nigahbān ga.e
manzil-e-dahr se ūñToñ ke hudī-ḳhvān ga.e
apnī baġhloñ meñ dabā.e hue qur.ān ga.e
ḳhanda-zan kufr hai ehsās tujhe hai ki nahīñ
apnī tauhīd kā kuchh paas tujhe hai ki nahīñ
ye shikāyat nahīñ haiñ un ke ḳhazāne māmūr
nahīñ mahfil meñ jinheñ baat bhī karne kā shu.ūr
qahr to ye hai ki kāfir ko mileñ huur o qusūr
aur bechāre musalmāñ ko faqat vāda-e-hūr
ab vo altāf nahīñ ham pe ināyāt nahīñ
baat ye kyā hai ki pahlī sī mudārāt nahīñ
kyuuñ musalmānoñ meñ hai daulat-e-duniyā nāyāb
terī qudrat to hai vo jis kī na had hai na hisāb
tū jo chāhe to uThe sīna-e-sahrā se habāb
rah-rav-e-dasht ho sailī-zada-e-mauj-e-sarāb
tān-e-aġhyār hai rusvā.ī hai nādārī hai
kyā tire naam pe marne kā evaz ḳhvārī hai
banī aġhyār kī ab chāhne vaalī duniyā
rah ga.ī apne liye ek ḳhayālī duniyā
ham to ruḳhsat hue auroñ ne sañbhālī duniyā
phir na kahnā huī tauhīd se ḳhālī duniyā
ham to jiite haiñ ki duniyā meñ tirā naam rahe
kahīñ mumkin hai ki saaqī na rahe jaam rahe
terī mahfil bhī ga.ī chāhne vaale bhī ga.e
shab kī aaheñ bhī ga.iiñ sub.h ke naale bhī ga.e
dil tujhe de bhī ga.e apnā sila le bhī ga.e
aa ke baiThe bhī na the aur nikāle bhī ga.e
aa.e ushshāq ga.e vāda-e-fardā le kar
ab unheñ DhūñD charāġh-e-ruḳh-e-zebā le kar
dard-e-lailā bhī vahī qais kā pahlū bhī vahī
najd ke dasht o jabal meñ ram-e-āhū bhī vahī
ishq kā dil bhī vahī husn kā jaadū bhī vahī
ummat-e-ahmad-e-mursil bhī vahī tū bhī vahī
phir ye āzurdagi-e-ġhair sabab kyā ma.anī
apne shaidāoñ pe ye chashm-e-ġhazab kyā ma.anī
tujh ko chhoḌā ki rasūl-e-arabī ko chhoḌā
but-garī pesha kiyā but-shikanī ko chhoḌā
ishq ko ishq kī āshufta-sarī ko chhoḌā
rasm-e-salmān o uvais-e-qaranī ko chhoḌā
aag takbīr kī sīnoñ meñ dabī rakhte haiñ
zindagī misl-e-bilāl-e-habashī rakhte haiñ
ishq kī ḳhair vo pahlī sī adā bhī na sahī
jāda-paimāli-e-taslīm-o-razā bhī na sahī
muztarib dil sifat-e-qibla-numā bhī na sahī
aur pābandi-e-ā.īn-e-vafā bhī na sahī
kabhī ham se kabhī ġhairoñ se shanāsā.ī hai
baat kahne kī nahīñ tū bhī to harjā.ī hai
sar-e-fārāñ pe kiyā diin ko kāmil tū ne
ik ishāre meñ hazāroñ ke liye dil tū ne
ātish-andoz kiyā ishq kā hāsil tū ne
phūñk dī garmi-e-ruḳhsār se mahfil tū ne
aaj kyuuñ siine hamāre sharer-ābād nahīñ
ham vahī soḳhta-sāmāñ haiñ tujhe yaad nahīñ
vādī-e-najd meñ vo shor-e-salāsil na rahā
qais dīvāna-e-nazzāra-e-mahmil na rahā
hausle vo na rahe ham na rahe dil na rahā
ghar ye ujḌā hai ki tū raunaq-e-mahfil na rahā
ai ḳhushā aañ roz ki aa.ī o ba-sad naaz aa.ī
be-hijābāna sū-e-mahfil-e-mā baaz aa.ī
bāda-kash ġhair haiñ gulshan meñ lab-e-jū baiThe
sunte haiñ jām-ba-kaf naġhma-e-kū-kū baiThe
daur hañgāma-e-gulzār se yaksū baiThe
tere dīvāne bhī haiñ muntazir-e-hū baiThe
apne parvānoñ ko phir zauq-e-ḳhud-afrozī de
barq-e-derīna ko farmān-e-jigar-sozī de
qaum-e-āvāra ināñ-tāb hai phir sū-e-hijāz
le uḌā bulbul-e-be-par ko mazāq-e-parvāz
muztarib-e-bāġh ke har ġhunche meñ hai bū-e-niyāz
tū zarā chheḌ to de tishna-e-mizrāb hai saaz
naġhme betāb haiñ tāroñ se nikalne ke liye
tuur muztar hai usī aag meñ jalne ke liye
mushkileñ ummat-e-marhūm kī āsāñ kar de
mor-e-be-māya ko ham-dosh-e-sulaimāñ kar de
jins-e-nāyāb-e-mohabbat ko phir arzāñ kar de
hind ke dair-nashīnoñ ko musalmāñ kar de
jū-e-ḳhūñ mī chakad az hasrat-e-dairīna-e-mā
mī tapad naala ba-nishtar kada-e-sīna-e-mā
bū-e-gul le ga.ī bairūn-e-chaman rāz-e-chaman
kyā qayāmat hai ki ḳhud phuul haiñ ġhammāz-e-chaman
ahd-e-gul ḳhatm huā TuuT gayā sāz-e-chaman
uḌ ga.e Dāliyoñ se zamzama-pardāz-e-chaman
ek bulbul hai ki mahv-e-tarannum ab tak
us ke siine meñ hai naġhmoñ kā talātum ab tak
qumriyāñ shāḳh-e-sanobar se gurezāñ bhī huiiñ
pattiyāñ phuul kī jhaḌ jhaḌ ke pareshāñ bhī huiiñ
vo purānī rausheñ baaġh kī vīrāñ bhī huiiñ
Dāliyāñ pairahan-e-barg se uryāñ bhī huiiñ
qaid-e-mausam se tabī.at rahī āzād us kī
kaash gulshan meñ samajhtā koī fariyād us kī
lutf marne meñ hai baaqī na maza jiine meñ
kuchh maza hai to yahī ḳhūn-e-jigar piine meñ
kitne betāb haiñ jauhar mire ā.īne meñ
kis qadar jalve taḌapte haiñ mire siine meñ
is gulistāñ meñ magar dekhne vaale hī nahīñ
daaġh jo siine meñ rakhte hoñ vo laale hī nahīñ
chaak is bulbul-e-tanhā kī navā se dil hoñ
jāgne vaale isī bāñg-e-darā se dil hoñ
ya.anī phir zinda na.e ahd-e-vafā se dil hoñ
phir isī bāda-e-dairīna ke pyāse dil hoñ
ajamī ḳhum hai to kyā mai to hijāzī hai mirī
naġhma hindī hai to kyā lai to hijāzī hai mirī